Blog

Kamp by Trompie se duin

Kamp by Trompie se duin

Dit is Vrydagmiddag 4pm en Jean (ons oudste) maak gereed vir sy laaste “relay ladder event” by die Hoër Jongenskool Paarl. Ek hoor hoe “ping” my verdomde foon in my gatsak en ek weet dit is die manne wat al aan die beweeg is op pad Elandsbaai toe.

Knapie is skaars uit die water en na ʼn vinnige high-5 is ons op ʼn drafstap voertuie toe. Terug in Wellington word die laaste paar goed gepak en dan is ons ook op die pad.

Een van Jacques se koeie het ook sy Vrydag planne so bietjie omver gegooi toe sy besluit om vroegmiddag te begin kraam. So net buite Riebeeck Wes sluit ons by mekaar aan en takel die laaste +/- 160km saam aan.

Uiteindelik by Elandsbaai draai ons links by die Velddrift bord, oor die vlei en dan weer links by die volgende Velddrift bord. +/- 10km verder kry ons die grondpaadjie aan die regterkant en volg dit oor die duin tot waar die res van die spannetjie al sterk vure begin maak het.

Blad word geskud en iets kouds vir die keel word gou geniet voor die daktente aangepak word.

Ons span vir die naweek was soos volg:

  • Groenewald’s (Jacques, Carlize & Rialé)
  • Laas’e (Paul, Marina, Munnik, Streicher & Tessa)
  • Dreyer’s (Johan, Nicolene, Barbara-Mari & Ben)
  • Laubscher’s (Frans & Lunay)
  • Jonker’s (ek, Marli, Jean & Lian)

Soos altyd het Jacques nie teleurgestel nie en het voorwaar ʼn liplekker spyskaart vir die naweek uit gewerk.

Vrydagaand het dinge op die vuur soos volg gelyk: slap chips, calamari in ‘n braai pan, rooster vol prawns en ʼn swart mossel pot en room. Magtig daar water my mond sommer alweer.

Kamp by Elandsbaai

Saterdagoggend en Jacques is al vroeg aan die gang, besig om sy visvang “tackle” reg te kry voor hy afsak na die see.

Ek, Frans & die seuns sluit later by hom aan. Die seuns se tyd saam met ons is van korterduur en na ʼn kraaines besluit hulle om liewers die strand saam met Marli & Ben (Johan-hulle se hond) te verken.

Kamp by Elandsbaai

Terwyl daar gepoog (gebid) word om ʼn paar grotes uit die see te trek geniet die vrouens hul oggend koffie rustig bo-op die duin en wonder of daar dalk ʼn vars vis op die rooster gaan verskyn. Ongelukkig was geduld & geluk nie aan ons kant nie. Moes maar na oom Fred geluister het toe hy gesê het ons gaan maar sukkel om iets uit die water die kry.

Kamp by Elandsbaai

Laat oggend en ʼn rooster vol Stroebel burger patty’s & vark staanrib kry hulle plekke op/om die vuur. Hierdie sou maar net die begin van ons Saterdag se spyskaart gewees het, want van die oggend tot laat die aand was daar kos op die vuur. Na die burgers, was dit die staanrib, toe smaaklike Springbok fillit en om die aand af te sluit 4 x hoenders op die spit met roosterkoeke.

Wag ʼn bietjie – die roosterkoeke het nooit gebeur nie, of hoe Jacques? Haha

Laat middag word daar gepoog om die rugby (Springbokke vs Engeland) op RSG te luister, maar vir een of ander onverklaarbare rede word die toets toe NIE uit gesaai op RSG nie.

Nes die son sy laaste strale oor die see terug trek, kom die koue en wind. Gelukkig is ons goed beskud teen die wind en die vuur word sommer lekker gestook.

Kamp by Elandsbaai

Sondagoggend word daar nie eers probeer om die stokke in die water te kry nie. Mos nou klaar geleer dat daar nie visse is nie haha.

Paul is doening met voorbereiding van sy Mexican omelet. ʼn Regte moer-by-mekaar gereg, maar ook een wat nou al ʼn tradisie op Sondae oggende is as ons kamp/toer.

Kamp by Elandsbaai

Na ontbyt word kamp op geslaan en skoon gemaak. ʼn Laaste kiekie word geneem en dan trek ons weer die voertuie se neuse Elandsbaai toe om vir oom Fred te gaan groet.

Kamp by Elandsbaai

Dankie vir ʼn puik naweek almal. Maak sommer gou weer so.

Kliek hier vir ‘n paar foto’s van die naweek.

1 Comment

  1. Pierre Labuschagne

    Hallo Henry.
    Stuur bietjie vir my jou email adres. Ek wil graag kontak maak met jou.
    Ek edit elke maand jou stories vir Kamp is Lekker. Ek is die freelance fotograaf/storieskrywer vir Rikus by LekkeR Kampplekke. Ek dink ek moet bietjie saam met jou en jou familie gaan kamp en sommer `n stoeie doen oor julle gesin/kampgoeters/kampgroep…
    Vriendelike groete.
    Pierre Labuschage

Leave a Comment

Your email address will not be published. Required fields are marked *